Tatlong dibisyon, tatlong korona—at isang mainit na kontrobersiya. Kinilala si Teófimo López bilang bagong WBA welterweight champion matapos talunin si Rolando “Rolly” Romero sa pamamagitan ng majority decision sa kanilang 12-round na bakbakan sa T-Mobile Arena sa Las Vegas. Dalawang hurado ang pumabor kay López, 115-113 at 116-112, habang tabla naman sa 114-114 ang marka ng ikatlo. Dahil dito, hindi itinago ni Romero ang kaniyang pagkadismaya. Tinawag niyang “robbery” ang desisyon at iginiit na dalawang suntok lamang umano ang tumama sa kaniya—isang pahayag na medyo mahirap isabay sa tala ng CompuBox, kung saan nakalamang si López sa kabuuang suntok, 124 kontra 73. Baka ibang calculator ang gamit sa sulok ni Rolly. Ginamit ni López ang mabilis na footwork, kontroladong distansiya at matalas na jab upang pigilan ang mas malakas manuntok na si Romero. Nakapagtala siya ng career-high na 62 jabs at paulit-ulit na nakalusot bago makalapit ang kampeon. Gayunman, hindi naging simpleng pamamasyal sa Las Vegas ang laban para sa kaniya. Sa ikalimang round, binuksan ni Romero ang sugat sa ibabaw ng kanang mata ni López at sinundan ito ng left hook at malakas na right hand. Nayanig at duguan ang challenger, ngunit nanatili siyang kalmado, nakaligtas sa opensiba at muling nakontrol ang mga sumunod na round. Nagkaroon pa ng pagkakataon si Romero sa ika-11 round nang mapatumba niya sa balanse si López gamit ang left hook, subalit hindi niya ito nasundan ng sapat na pag-atake. Sa tagumpay, naging world champion si López sa ikatlong weight class matapos ang mga paghahari niya sa lightweight at junior welterweight. Mas kahanga-hanga ang pagbabalik dahil pitong buwan lamang ang nakalipas mula nang dominahin siya ni Shakur Stevenson. Para kay López, ang pagkatalong iyon ang nagtulak sa kaniyang muling pagbangon at pagkakasundo sa ama at trainer niyang si Teófimo López Sr. Makatarungan ba ang desisyon o may dahilan ang reklamo ni Romero? Maaaring magdebate ang mga tagahanga hanggang sa susunod na bell, ngunit malinaw sa rekord: si López ang umuwi na may sinturon, habang si Rolly ay umuwi na may napakahabang reklamo. #TeofimoLopez #BoxingNews #WBAWelterweight